فڕۆکەخانەی نێودەوڵەتیی ئەربیل لە ساڵی ٢٠٠٣ لە هەمان شوێنی فڕۆکەخانەی کۆن دامەزرا، کە پێشتر لە سەردەمی ڕژێمی بەعسدا تا ساڵی ١٩٩١ وەک بنکەیەکی سەربازی بەکارهاتووە، فڕۆکەخانەکە خزمەتگوزاری و بینا بنەڕەتییەکانی لەخۆگرتبوو؛ تێرمیناڵی گەشتیار، بینای بارهەڵگر، شوێنی وەستانی فڕۆکە، و فڕگەیەکی فڕین بە درێژی (٢٨٠٠) مەتر و پانی (٣٠) مەتر.

یەکەم گەشتی بازرگانی لە ١٥ی کانوونی دووەمی ٢٠٠٣ لە فڕۆکەخانەی نێودەوڵەتیی ئەربیل نیشتەوە، بەڵام لە ٢٩ی نیسانی ٢٠٠٥ بە فەرمی کرایەوە و لە ٢٦ی ئایاری ٢٠٠٥ کۆدی  ICAO (ORER) ی وەرگرت.

لەگەڵ گەشەسەندنی خێرای هەولێر وەک ناوەندێک بۆ چالاکییە ئابووری و بازرگانی و گەشتیارییەکان، ژمارەی گەشتە ئاسمانییەکان و گەشتیارەکان روو لە زیادبوون بوو، هەر لەبەر ئەم هۆیە حکومەتی هەرێمی کوردستان بڕیاریدا فڕۆکەخانەیەکی گەورەتر و مۆدێرنتر (فڕۆکەخانەی نێودەوڵەتیی ئەربیل) لە تەنیشت فڕۆکەخانەی کۆن دروست بکات.

فڕۆکەخانەی نێودەوڵەتیی نوێی ئەربیل لەلایەن گروپی سکۆت ویلسۆنی بەریتانی دیزاین کراوە و لەلایەن کۆمپانیای ماکیۆل-جەنگیزی تورکیەوە لە ساڵی ٢٠٠٥ بە هەماهەنگی لەگەڵ وەزارەتی ئاوەدانکردنەوە و نیشتەجێکردنی هەرێمی کوردستان بنیاتنراوە. تێچووی ئەم پڕۆژە ستراتیجیە، لەلایەن حکومەتی هەرێمی کوردستانەوە تەرخانکراوە.

فڕگەی فڕۆکەخانەی نێودەوڵەتیی ئەربیل کە بە درێژی ٤٨٠٠ مەتر و پانی ٧٥ مەترە، لە ڕیزی ١٠ درێژترین فڕگەی فڕینی جیهاندایە. تێرمیناڵی گەشتیارەکان توانای خزمەتکردنی ٤٥٠٠٠٠٠ هەزار گەشتیاری هەیە لە ساڵێکدا. هەروەها لاونجێکی CIP هەیە بۆ گەشتیارە  پلە یەک و بازرگانەکان بۆ ئەوەی گەشتێکی ئاسوودە ئەزموون بکەن. جگە لەوەش، تێرمیناڵی تایبەتی VIP هەیە بۆ خزمەتکردنی کەسایەتییە بەرز و دیپلۆماسییەکان. هەروەها فرۆکەخانەی نێودەوڵەتیی ئەربیل بینای تێرمیناڵێکی بارهەڵگریش لەخو دەگرێت.

لە سەرەتای ساڵی ٢٠١٠ بنیاتنانی فڕۆکەخانەی نوێ کۆتایی پێهات و لە ١ی ئەیلولی ٢٠١٠ گواستنەوە لە فڕۆکەخانەی کۆنەوە بۆ فڕۆکەخانەی نوێ جێبەجێ کرا بەبێ ئەوەی هیچ کاریگەرییەکی لەسەر کارکردنی گەشتەکان هەبێت. فڕۆکەخانەی نێودەوڵەتی ئەربیل لە ٣٠ی ئازاری ٢٠١١ بە فەرمی لەلایەن جەنابی سەرۆک "مەسعوود بارزانی" (سەرۆکی هەرێمی کوردستان لەو سەردەمە) و بەڕێز ڕەجەب تەیب ئەردۆغان (سەرۆکی وەزیرانی تورکیا لەو سەردەمەدا) کرایەوە.

لە ئێستادا نزیکەی ٢٠ هێڵی ئاسمانی لە فڕۆکەخانەی نێودەوڵەتی ئەربیل گەشتی ناوخۆیی و نێودەوڵەتی پێشکەش دەکەن بۆ چەندین شوێن لەوانە بەغدا، بەسرە، نەجەف، دوبەی، دۆحە، شاریقە، قاهیرە، تاران، جەددە، مەدینە، کوەیت، بەیروت، عەممان، ئەستەنبوڵ، ترابزۆن، ئەنقەرە ، حەلەب، هانۆڤەر، ڤیەننا، فرانکفۆرت، دوسلدۆرف، کۆپنهاگن، بەرلین، میونشن، کۆڵن، ئەمستردام، باکۆ، تبلیسی و هتد.

لەکاتی شەڕی دژ بە (داعش) فڕۆکەخانەی نێودەوڵەتی ئەربیل ڕۆڵی گەورەی هەبوو لە دابینکردنی کەلوپەلی سەربازی بۆ فڕۆکەوانی سەربازی عێراق و هێزەکانی هاوپەیمانان.